“Egin eta Desegin” lehiaketako argazki muntaiez osaturiko erakusketa Euskadiko hainbat udalerrietan barna dabil

“Egin eta Desegin” lehiaketara aurkeztu ziren 92 argazki muntaietatik 11 aukeratu dira euskal gazteriak Palestinako errefuxiatuen inguruan dituen estereotipoak desegiten jarraitzeko erakusketa osatu ahal izateko.

13 panelek osatutako erakusketak ikuserraza den formatu bat du eta material pedagogiko gisa landu da.  Lehiaketan parte hartu zuten gazteen herrietatik modu ibiltarian igarotzen ari da erakusketa, ondorengo programari jarraiki:

 

-        2019ko azaroaren  4tik  28ra, Laudioko BHI ikastetxean (Araba)

-        2019ko abenduaren 2tik 13ra, Astigarragako Kultur Etxean (Gipuzkoa)

-        2019ko abenduaren 16tik 2020ko urtarrilaren  17ra, Donostiako Okendo Kultur etxean (Gipuzkoa)

-        2020ko urtarrilaren 20tik 31ra,  Gernikako BHI ikastetxean (Bizkaia)

 

Erakusketa hau "Euskadin  Ekialde Ertaineko errefuxiatuen inguruko eta batez ere, Palestinako errefuxiatuen inguruko aurreiritziak eraldatzen generoaren, kulturartekotasunaren eta giza eskubideen ikuspegitik" proiektuaren barruan kokatzen da, zeina Garapenerako Lankidetzaren Euskal Agentziaren diru laguntzari esker burutu ahal izan den.


UNRWA Euskadik errealitate areagotuko liburu bat kaleratu du, euskal gazteek Palestinako errefuxiatuen egoera humanitarioari buruzko kontzientzia kritikoa sustatzeko

"Najmaren motxila" bi  neraberen arteko adiskidetasun istorioa kontatzen duen Errealitate Areagotuko liburuaren izenburua da: Zisjordanian (Palestinako lurralde okupatua) bizi den Najma, eta Laguardian (Araba) bizi den Nahia. Gutun bidezko komunikazioen eta sare sozialen bidez, Najmak eta Nahiak irakurleekin beraien nahiak, ametsak eta zailtasunak partekatzen dituzte eta, aldi berean, Palestinako errefuxiatuen eskubideen-urraketa egoera  jakinarazten dute.

 

Proposamen berritzaile honi esker, nerabeek eta gazteek Palestinako errefuxiatuen, giza eskubideen, generoaren eta balioetan oinarritutako hezkuntzaren inguruko hausnarketa sortzen duten argazkiak, pertsonaia bizidunak eta ariketa didaktikoak eskura ditzakete. Google Playren "Najmaren motxila" errealitate areagotuko App-a mugikorrean edo tabletan deskargatu eta “Najmaren motxila” liburuko 5. orrialdeko argibideak jarraitu besterik ez dute egin beharko.

 

Baliabide pedagogiko honen bidez, UNRWA Euskadik euskal gazteriak Ekialde Hurbileko errefuxiatuen eta, bereziki, Palestinako errefuxiatuen inguruan dituen estereotipoak eta aurreiritziak desegiten lagundu nahi du.

 

Creativitic-ek UNRWA Euskadirentzat egindako materiala da, Garapenerako Lankidetzaren Euskal Agentziaren diru-laguntzari esker sortu dena.


EKIALDE HURBILEKO ERREFUXIATUEN INGURUKO PERTZEPZIOEN IKERKETAREN AURKEZPEN EKITALDIA BILBON

Pasa den abenduaren 4an, “Euskal gizarteak Ekialde Ertaineko eta bereziki Palestinako errefuxiatuei buruz duen pertzepzioaren diagnostikoa” ikerketaren aurkezpen ekitaldia antolatu zen Bilboko Basurtoko Barrutiko udal zentroan. Ikerketa UNA Gestión y Comunicación-ek burutu du UNRWA Euskadirentzat ADIMEN Investigación-en kolaborazioarekin.

 

Ekitaldia, Bilboko Udalaren Zurrumurruen aurkako Estrategiaren testuinguruan antolatu zen eta bertaratu zirenek, euskal gizarteak Ekialde Ertaineko eta bereziki, Palestinako errefuxiatuei buruzko genero eta kultur estereotipo eta aurreiritziei buruzko informazio fidagarria eta zehatza jaso ahal izan zuten ikerketako koordinatzaile izan den Arkaitz Gorritxoren ahotik.

 

Ekitaldian Isabel Perez, Ekialde Ertainean espezializatutako kazetariak eta Arkaitz Gorritxo López-ek , Generoan eta Garapenean espezialista eta ikerketako koordinatzaile eta aholkulari izan denak parte hartu zuten. Hauez gain, Tomo Estudioko José Astuy Velasco-k, “Zutik” animaziozko laburmetraia aurkeztu zuen.  Film labur honek euskal gizarteak Ekialde Ertaineko eta bereziki Palestinako errefuxiatuen inguruko pertzepzio eta estereotipoak aldatzea du helburu eta Tomo estudiok UNRWA Euskadirentzat egina da.


AURREIRITZIAK DESEGITEKO BIDEOFORO BAT

Joan den hilean Elgoibarko Gaztelekuarekin indarrak batu genituen Ekialde Hurbileko errefuxiatuen inguruko eta, bereziki, Palestinako errefuxiatuen inguruko kultura- eta genero-aurreiritziak desegiteko bideoforo bat antolatzeko.

 

Saioa Elgoibarko Gaztelekuan bertan burutu zen eta guztira 14 nerabe gerturatu ziren Palestinako emakume zuzendariek eginiko laburmetraiak ikusi eta hausnarketa helburu zuten talde dinamikak egitera.

 

Bideoforo hau Gipuzkoako Foru Aldundian laguntzarekin burutu ahal izan da eta ekintza honen baitan hedabide tradizionalek maiz ezkutatzen duten errealitatea ikusarazteko aukera izan zuten 12 eta 15 urte bitarteko gazteek.


‘GERRA ZIBILA GIPUZKOAN: ERRESISTENTZIA ETA DUINTASUNA’ ERAKUSKETAN PARTE HARTU DU UNRWA EUSKADIK

Abenduak 28 arte ikusgai egongo den 'Gerra zibila Gipuzkoan: erresistentzia eta duintasuna’ erakusketak milaka gipuzkoarren historiak azpimarratzen ditu memoria kolektiboaren berridazketaren bidez. Antoni Nicolauk komisariatutako erakusketa honetan, hainbat pertsonaren bizipenak ezagutu ahal izango dira, baita garai hartako hainbat material eta objekturen inguruko ibilbidea egin ere.

 

Gainera, adin guztientzako tailerrak antolatu dira, Gerra Zibileko bizipenak nola iritsi zaizkigun hausnartzeko eta gertakari horren kontakizun indibiduala eta kolektiboa osatzeko asmoz.

 

Gatazka armatuetan herritarren sufrimenduan fokua jartzeko, UNRWA Euskadik Gazako Zerrendan eta Siriako gerran izandako erasoen 6 argazkirekin lagundu du. Horien helburua erakusketa bisitatzen duten pertsonei, nahiz eta iraganeko gertakari bat izan, gaur egun beste gatazka armatu batzuk daudela gogoraraztea da, eta horien biktima nagusiak erakusketaren protagonistetatik hain desberdinak ez direla azalaratzea.